जुनसुकै सरकारी कार्यालयमा पनि कार्यालयले प्रदान गरेको सेवा सुविधा प्रति गुनासो तथा सुझाव लिनका लागि सुझाव पेटिका राखिएको हुन्छ । कार्यालयको मुल प्रवेशद्धार नजिकै राखिने सुझाव पेटिका जोकोहीले पनि कार्यालय छिर्ने बेलामा सजिलै देख्न सक्छन् ।
कार्यालयवाट सेवा लिँदा सबै सेवाग्राहीहरु पक्कै सन्तुष्ट हुँदैनन् । सेवामा सुधारका लागि सेवाग्राहीकै सल्लाह, सुझाब र गुनासो लिन राखिने त्यस्ता सुझाब पेटिका सोलुखुम्बुमा भने प्रयोगवीहिन बनेको छ । सरकारी कार्यालयहरुमा राखिएका त्यस्ता सुझाब पेटिकामा बर्षौदेखि सुझाब तथा गुनासोहरु पर्न सकेको छैन ।
जिल्ला प्रशासन कार्यालयमा राखिएको सुझाब पेटिकामा विगत ६ महिनादेखि एउटै पनि सुझाब परेको छैन । कामु प्रमुख जिल्ला अधिकारी चोमोन्द्र न्यौपाने भन्नुहुन्छ “सुझाब पेटिकामा सुझाबै पर्दैन, ६ महिनादेखि खाली छ ।” सुझाब पेटिकामार्फत् कसैले उजुरी समेत नदिएको न्यौपानेले बताउनुभयो ।
जिल्ला प्रशासनको मात्रै हैन जिल्ला प्रहरी कार्यालयको सुझाब पेटिकाको हालत पनि उस्तै छ । उजुरी दिनु परे सेवाग्राहीहरु सिधै कार्यालयमा नै पुग्ने गरेकाछन्, सुझाब पेटिका तिर ध्यान नै दिँदैनन् । “दिनहुँ दर्जनको हाराहारीमा उजुरी आउने गरेको भएपनि सुझाब पेटिकामा केही छैन” प्रहरी नायब उपरिक्षक योगबहादुर पालले भन्नुभयो ।
जिल्लाका अरु सरकारी कार्यालयका सुझाब पेटिकाहरुमा पनि सुझाब नपर्ने सम्बन्धित कार्यालय प्रमुखहरुको भनाई छ । सुशासन व्यवस्थापन ऐन २०६४ अनुसार प्रत्येक कार्यालयमा सुझाब पेटिका राखिएको छ ।